තොල් රත් පැහැ නොගෑවාට,
අංජන නෙත් නොඇන්ඳාට,
හිත දේදුණු පරදයි කොලුවෝ
උස ඩිංගක් මදි වුණාට,
මූන ටිකක් කලු වුණාට,
හිත ඒ හැටි කලු නෑ කොලුවෝ
.
කොණ්ඩෙට වැඩ නොදැම්මාට,
ඇහිබැම සුන් නොකෙරුවාට,
මේ ගති මට සරළයි කොලුවෝ
එක එක ඇඳුමට සරිලන,
පාට පාවහන් නැතුවට,
පොකට්ටුවට කදිමයි කොලුවෝ
.
තරු හෝටල් මග ඇරියට,
සයිවර් කඩයට ගියාට,
ගෑරොප්පුව පුරුදුයි කොලුවෝ
මහ සෙනගට වෙර බැන්ඳට,
හුදෙකලාව පිය කෙරුවට,
හුරතල් ගති අඩු නෑ කොලුවෝ
.
ස්‍රැතියෙන් එපිටහ ගැයුවට,
කවි එලි වැට නොරැක්කාට,
ඔය කොයිකත් උඹටනෙ කොලුවෝ
මගෙ පාඩුවෙ මං උන්නට,
වැඩි උනන්දු නොකෙරුවාට,
මං ආදරෙ උඹටයි කොලුවෝ
.
෴ . විලෝචනා . ෴
No comments:
Post a Comment
leave your comment here...