💛
කුණාටුව,
කුමට වෙර බඳිමිද මම නුඹට,
රැගෙන ආ,
මල් වරුසාව විඳ විඳ...
.
ගින්න,
නුඹ දැවූවාට සාප කරනු කිම,
දවාලු අලු,
පෙරටත් වඩා පෝෂණය දී,
සාරවත් කල බැව් දැක දැක...
.
මුරුගසන් වරුසාව,
සියලු දෑ සෝදා පාලු කල ද නුඹ,
කුමට දොස් පවරමිද මම,
දෙව් බඹුන්ට වඩිනට,
සියල්ල දොවා පවිත්‍ර කල බව දැන...
.
නියඟය,
නුඹ ම නොවෙද,
කර්කශව ඉරිතැලුණ මහ පොළොවේ,
නිරුදක වේදනාවට ද ඔරොත්තු දී...
මල් ඵල බර විල් ඉතිරෙන,
වසන්තයක අගය ද,
ඒත්තු ගැන්වූ...
සුන්දර ශාපය...
නුඹට තුති...
වසන්තය එන තෙක්...
මාරයා මං මුලා කලාට...
.
වෙනස් ඍතු නුඹව ඕනෑම අවස්ථාවකට ඔරොත්තු දෙන ලෙස සූදානම් කරවයි... 😊 දුෂ්කර බව නුඹට සැප පහසුවේ අගය කියා දෙයි... අයහපත, ඔබට යහපත කොතරම් සොඳුරුද යන වග අත්දැකීමෙන් ම ඒත්තු ගන්වයි... අටලෝ දහමින් කම්පා නොවන්නට නිදසුන් ගෙනහැර දක්වයි...
.
© විලෝචනා අබේකෝන්
