.
අම්මී ... ඇය තරම් බල්ලන්ට බය කෙනෙක් නොවීය.ඇය හුරු වුණ සතෙක්ට කරුණාව දැක්වුවද මම දන්නා තරමින් ඉස්සර නම් ඇය බල්ලන් දකිනා විට පසු බසින්නීය.නමුත්
සෑම සරසවි නිවාඩුවකම නිවස බලා යන මටත් නිවසට යන නිවැසියන් කාටත් අම්මිගෙන් මෑතකදී සිට ලැබෙන සුපුරුදු අනතුරු ඇඟවීම නම් මෙයයි!
.
" බැල්ලි පැටව් දාලා ඉන්නේ,ගෙදර ළඟට එද්දි කියන්න "
.
අපේ ගෙදරට යන අපිටත් සද්දෙ දාන්න පිරිසක් මේ විදිහට ලක ලෑස්ති වෙලා ඉන්නේ ඔවුන්ට රජ කරන්න ඉහල මාලයේ යායට ඇති ස්ලැබ් එකත් බලිය වගේ ඇර දමා ඇති විශාල ඉදිවෙමින් පවතින නිවසටම බද්ද වුණු අනික් ගොඩනැගිල්ලත් සිත් සේ ඔවුන්ට පාවිච්චියට ඉඩ දී ඇති නිසාය.අපේ අම්මිත් වෙලාවකට කියන්නී ...
.
" ඒකත් හොඳයි! හොරෙක් හතුරෙක්ට එන්නත් බෑනේ ... "
" කෑම ටිකක් උයලා දාමු බැල්ලිට...පැටව් දාලා නිසා කිරි දෙන්න ඕනනේ,බඩගිනි ඇති "
.
ඉතිං ඒ විදිහට මෙවැනි බලු පරම්පරාවක් වෙනුවෙන් ඇයට බත් හට්ටියක් ලිපේ තැබීමට සිදුවී ඇත.පැන්නුවද නැවත පැමිණෙන්නේ එතනටමය! මමත් ඇයට දෙවනි නැත.උන්ට කාරුණික වීම මගේත් පුරුද්ද විය.
.
ඉතින් දිනක් අම්මිත් මමත් නිවසින් පිට ගමනක් ගොස් පැමිණෙන විට බෝල බෝල වගේ බලු පැටව්න් එහෙ මෙහෙ දුවනයුරු දැක්කෙමි.ඉතින් හුරතලේට, ආදරේට මෙන් උන් පිටු පසින් පන්නන විට පැටවුන්ට කරදරයකැයි සිතූ බැල්ලිය බුරාගෙන මගේ ඇඟට කඩා පාත් වුණාය.කලබලකාරී වාතාවරණයක් ඇති වුණ අතර මටත් කර කියා ගැනීමට යමක් සිතා ගත නොහැකි විය . කෑම දැම්මත් අපෙ අම්මි උන්ට බයයි! ඒත් සැනෙකින්ම ඒ මොහොතේ අපේ අම්මි මගේ ඉදිරියට පැන මාව පසුපසට කර බැල්ලිට කෑ ගසා ඇයව පන්නා හරින්නට විය.බල්ලන් දැක්කත් බය වෙන ඇය මා වෙනුවෙන් කල මේ වික්‍රමය දැක මා විමතියට පත් විය.
.
නැත... එහි කිසිඳු පුදුමයට කරුණක් නැත ........ පැටවුන් වෙනුවෙන් අපට එරෙහි වුණ ඇයත් ........ පැටික්කියක් වෙනුවෙන් උන්ට එරෙහි වුණ ඇයත් ........ අප කවුරුත් හඳුනන ... 
".... අම්මා..." වන නිසා ... 