ඩිංගකට ඇවිත් මේ
පැත්තකින් ඉඳගන්න
කියන්නම් කතාවක්
අද හොඳින් අහගන්න
ගෙවුණු පහුගිය වසරෙ
කෙරු අවැඩකම් ටිකම
එපා එන වසරටත්
අනේ අරගෙන යන්න
.
එපා වෙනකුගෙ පණක්
නසන මරුවෙකු වෙන්න
එපා වෙනකුගෙ දෙයක්
අයිති නැති නම් ගන්න
එපා රවටන මැයින්
මුස බස් තෙපලන්න
එපා මත් වෙන දෑට
සේසතම දන් දෙන්න
.
පිනට පසුබට නොවී
හොඳ දේම වපුරන්න
නුඹ වැපිරු අස්වැන්න
නුඹට බව දැනගන්න
කරන දෑ කිම වුනත්
යහපතට මුල් වන්න
සිදුවු හැම කරුණක්ම
හොඳට යැයි පිළිගන්න
.
ගෙවුණු ඒ අතීතයෙ
හොඳම පමණක් ගන්න
පාඩමක් ඉගෙන ගෙන
අතීතය වලලන්න
නොවිසඳුම් විසඳන්න
කාලයට ඉඩ දෙන්න
හෙට ඉඳන් නව වසක්
නව දිනක් අරඹන්න
.
...::: © විලෝචනා :::...
