කැම්පස් යද්දි නතර වෙලා හිටපු බෝඩිමේ සීයා හොඳටම අසනීප වෙලා... ඉක්මනටම සුව වෙන්න කියලා ප්‍රාර්ථනා කරනවා 😖.
ආගන්තුක එදා සරසවියට යාව
කිසිවෙක් නොවිය දන්නා හඳුනන මාව
බෝඩිම ළඟින් පන්සිල් කියනා රාව
ඇසුනෙන් හැඳින්නෙමි ආදර සීයාව
.
බඩගින්නෙද ජයේ මොනවත් කෑවාද?
ගත් ඉඳියප්ප මුල දුන්නොත් ඇතිවේද?
හිස් බඩ ඉන්නෙපැයි කී කළ අවවාද
තම අහරෙන් අඩක් දුන්නේ මට නොවෙද?
.
අප්පච්චී මෙමා හැර දුර ගිය දාට
කිරිදුව කියන්නට කිසිවෙක් නැති දාට
පිය සෙනෙහසින් අඩුවක් මට නොකලාට
මදි කල් නුඹට ඒ කළගුණ සලකන්ට
.
මහ රෑ දහක් වැඩ නිම කර බෝඩිමට
ආවම නොවිය හැල හොල්මන් තනියකට
ඇඟ පත සෝදගෙන එනතුරු ගේ තුළට
නිදි මැරුවා නුඹත් නුඹෙ දරු කැක්කුමට
.
ජාතිත් ජාති නුඹ කවුරුන් හෝ වීලා
මගෙ අහලකින් ඉපදෙන බව සැලවීලා
සසරේ පුරුද්දට නුඹෙ සෙනෙහස ලැබිලා
කෙතරම් දරුවො හිනැහී ඇත සැනසීලා
.
මෑතදි ගියත් නුඹෙ සැප දුක විමසන්න
එක් තැන් වෙලා බෑ වදනක් පවසන්න
සියයක් ආයු මගෙත් ආයු ගෙන මෙන්න
සිය වසකට වඩා ඔබ ජීවත් වන්න
.
ලෝ දහමට කාත් කවුරුත් ලෙඩ වෙනවා
පින් දම් කලැත්තෝ දස මරු පරදනවා
මොනවද කියන්නට වගෙ නුඹ සැරසෙනවා
එය දැනගන්න සනීපවෙන්නට වෙනවා
.
නයි සර්පයින් ගෙන් මා බේරාගන්න
යන මග හෙලි පෙහෙළි හැකි තෙක් කර දුන්න
නුඹෙ ඒ සවිය යලි දෑසට දැක ගන්න
මගෙ රත්තරන් සීයෙ යලි නැගිටින්න
