පැවති පීඩාකාරී උෂ්ණත්වයත් පීඩනයත් හමුවේ මා දුක නම් වූ මහමෙරින් මවුලයක් ඌර්ධවාපතනය කිරීමට නුඹේ ළයෙන් වැගිරුණු ප්‍රේමණීය ඌර්ධවාපතන එන්තැල්පිය මෙතෙකැයි කියා මවුලයට කිලෝ ජූල් මගින් දැක්වීමට මම අසමර්ථ වීමි... නුඹ මට රසායන විද්‍යාව කියා දුන්නේ නුඹේ ළයෙන් ගිළිහුණු ඒ උණුසුම කැටි කොට ගත් ශක්තියෙන්මය...
නිව්ටන්ගේ නියමවත් වලංගු නැති අවස්ථිති නොවන නිර්දේශ රාමුවක් ලෙස ඉවක් බවත් විරහිතව මා සිත නැමැති උත්තෝලකය ත්වරණයකින් කඩා වැටෙමින් තිබුණු සැටි මතකය... හුදෙක් මා නියුතු ගමනෙන් මිදී නුඹ පෙන්වූ මගෙහි යාමට මා සිත දැක්වූ අවස්ථිතිය පිළිබඳව අද මා සතු වන්නේ අසීමිත කණගාටුවකි...
ගැටුම් අතර ගැටුම් දහසකට ලක් වූවද නුඹේ ප්‍රේමය සතුවූ චාලක ශක්තිය නිරතුරුව පූර්ණ ප්‍රත්‍යක්ෂ විය... මාගේ නාස් විවර ඔස්සේ අනුශ්වාස නාලිකා පසු කොට පෙනහළු වල ගර්ත කරා පැමිණි ආශ්වාස වායුව හා බැඳී මා මෙතෙක් කල් ජීවත් කලේ නුඹේ ඒ පූර්ණ ප්‍රත්‍යක්ෂ ප්‍රේමයයි ...
නුඹෙත් මගෙත් අන්තර් ආකර්ෂණ බලය අනන්ත හෙයින් නුඹේ අසංඛ්‍ය ප්‍රේමය පසෙක ලා නුඹෙන් මිදී දුරක යාමට මා තුළ පැවතිය යුතු වියෝග ප්‍රවේගය පිළිබඳව දළ අදහසක් හෝ මා සතු නොවේ ...
මතු පිටින් අඩු පීඩනයක් පෙන්වමින් හද පතුලෙන් මහත් පීඩනයක් දරමින් නුඹ තුළ ඇති කර ගත් පීඩන වෙනසින් මා ඔසවා බ'නූලි ප්‍රමේයෙන් මෙතෙක් දුර මා ගිළිහෙන්නට නොදී රැගෙන එමින් නුඹ මට කියා දුන්නේ වාස්ථවික බවින් මනෝමූලික පහස ලත් භෞතික විද්‍යාවයි ...
මා සිරුරේ සජීව සෛල තුළ බිහිවී මා තුළ ජෛව රසායනික ප්‍රතික්‍රියා උත්ප්‍රේරණය කලාවූ ඒ සදාදරණීය එන්සයිමය නුඹයි... නුඹට පමණක්ම කැපවූ මාගේ හදවත නැමැති උපස්ථරය මත පමණක්ම මිස වෙනත් උපස්ථරයක් මත ක්‍රියාත්මක නොවී නුඹ සදා රකිනුයේ එන්සයිමයක
උපස්ථර විශිෂ්ඨතාවයයි...නුඹේ ප්‍රේමය වනාහි එහි සංලග්න කාණ්ඩයයි...
නුඹේ ස්පර්ෂ සන්නමනයෙන් මා සෛල තුළ සිදුවන ශුණතාවයේ ප්‍රත්‍යාවර්තී වූ වෙනසින් රුහුණත් කඳුරටත් යා කෙරුණු ඒ දුම්රිය ගමන් මග පුරා මා නුඹ සමීපයෙහි සුව නින්දක වෙලෙමි ...
ඌනන විභාජනයෙන් හදවත් දෙකක නිපැදුණු ප්‍රේමයේ ජන්මාණු සෛල එක්වී සැදුම් ගත් සංසාරගත බැඳීම නම් වූ යුක්තාණුව කළලයක් බවට විකසනය විනැයි පවසමින් මා සසර පුරා නුඹට කියා දෙන්නේ ප්‍රාණය පදනම් කරගත් ජීව විද්‍යාවයි ...
මීට,
නුඹටම කැපවූ,
උපස්ථරය ...
J'shi
